Hou, hed dä gfluecht. Gottsläschterligi Flüech hed er abgloo.
Aber fönge mir vo vornen aa.
Ich ha do letschti z Sissech in dr nöie „Begegnungszone“ e chlyy welle go schwanze – begeegne, wie me dem hütt säit.
Die erscht Begeegnig, syy denn zerscht emool e huffen aanegstellti Auti gsi, wo mir dr Wääg verstellt häi. Wie früener, han ich süüferlig zwüsche zwee Göppel füüregüggelet, öbb ich ooni überfaare z wäärde, cha uf d „Zone“ uusetschalppe.
Denn bin ich den schöön lamaaschig obsi, Richtig Volksstimm gloffe und ha mi an de nöie Sitzbänkli, wo immer no ganz gsii sy, gfröit.
Bis ebne en Autifaarer hinder mir d Näärve verloore und mir alli Schlötterlig aaghänkt hed. Ich selli do nit in dr Wältgschicht ummedrotten und uus em Wääg goo.
Aso graaduuse, äigedlig han ich mir s Begeegnen e chlyy anderscht vorgstellt.
Gottsläschterlig = schändlich
schwanze = flanieren
Zone = nicht zu verwechseln mit der sowjetischen Zone in der ehemaligen DDR
