As es äis für allemool gsäit isch.
Wenn ab hütte z Sissech öbber säit, ich gang uuf e Strich, isch nit das gmäint, wo dir jetz mendet. Z Sissech goot me nämmlig nümm go Kommissioone mache. Z Sissech goot men ab sofoort uuf e Strich.
Mit em Strich isch die soumeessig düüri «Begegnungszone Strichcode» gmäint. Dört chäärlen Auti, tschalppe Fuessgänger, soue Weeloo, spiile Chinder, gwaggle Wandergruppe, grätten olti Lütt und sünscht non e huffen anderi wild duurenander. Es souglatts Chruusimuusi und Gnusch. E Wiirlede wie z Basel am Morgesträich – numme mit weeniger Schwoobe. Aber alli syy oortlig mitenander. Niemer dräänglet füre. Es goot richtig braav zue und hääre. Und wenn halt ööben äinisch es Auti oder es Weeloo doch z schnäll duuresyyrachet, muesch halt as Fuessgänger Achtig gee, as nit zmitts uuf dr Strooss (Strichcode) tschumplisch.
Wie immer halt!
go Kommissioone mache = Einkaufen
grätte = breitbeinig gehen
Chruusimuusi = Durcheinander
Achtig gee = aufpassen
