S Meersöili

84 Dääg syy vergange. I bi in deere Zyyt fascht duubedänzig woorde.
Soo lang haan iich nämmlig bruucht, bis i alli Sytte vom nöie Dierschutzgsetz dureglääse ghaa haa. Das häisst jetz aber nit, ass iich au alles verstande haa. Es döönt nämmlig alles soumeessig kompliziert, wo dört drinne stoot. Wie mäischtens halt, wenn der Staat öppis in Uufdraag git. Natüürlig häi au e Huffe gschyydi Frauen und Mannen an däm Mammutwäärch gschriibe. Und glaubed mir, es stoot au e Huffe Wichtigs, aber no vill mee Gschyyds drinn.
Nääme mer emool aa, diir häit dehäi nummen äis Meersöili. Und scho häit diir es sou(Meersöili)meessigs Probleem. Äis Söili eläi goot nämmlig nümm. Das wiird in syyner Äinsamkeit nämmlig soo druurig, ass es chönnti es Maagegschwür überchoo. Und das wäi mer jo nid, gälled! Jetz häit dir zwee Mögligkäite. Nones Gspöönli, aso es zwöits Meersöili, chaufe oder e Pfanne voll Bolänta überdue. Verstande, was i mäin? Guet.
Bi de Schildchrött isch d Sachlaag au nit so ganz klaar. Die chömmen äigedlig eläi zimmlig guet zrächt. Es hed ämmel no nie äini reklamiert – e Schildchrott. Was me jetz aber nit so genau wäiss: Daarff me, wenn sone Chrott s Zyttlig säägned, e Schildchrottsuppe druus choche?
Chälber: Die müesen ap em Joor 2013 immer nöime chönne Wasser lüttere. Das isch jo guet und rächt. Mii wundered s jetz äifach numme: Häi denn die aarme Vyychli bis jetz nüt drunke?
Schoof: Wenn de dehäi es Schoof eläi haltisch, mues dä Wullechnöiel immer Sichtkontakt miteme Kolleeg oder mitere Kolleegin haa. Und wenn dä Kolleeg wyt ewägg isch, mues me däm Dierli halt e Brüllen aalegge. Ass miir öis richtig verstönde. Der Noochber längt nit as Schoofbock.
Guet, e Sou häi, usser de Buure, die wenigschte dehäi. Doo häit dir Glück ghaa. Wenn dir nämmlig sones Borschtevyych as Huusdier wäit zuedue, müessed dir draadänke, ass sich en äinzelni Sou jederzyyt mues chönne beschäftige. Mit e chlyy Geduld, chönnt me däm Dier sicher «Eile mit Weile» byybringe.
Ganz speziell aber isch d Gsetzeslaag bi de Goldfisch. Früeijer, wenn äin vo deene gmuudered hed, häit diir iin äifach d Toiletten aabegspüelt. Mit däm isch jetz aber fertig. Das häisst. Dir döörffed das Fischli scho no der Aboort duraabespüele. Voorhäär müesed dir iin aber fachgrächt yyschlööfe. Wie me daas genau macht, wäissi au nit. Eerscht denn, wenn das Fischli nümm bi Bsinnig isch, döörffed diir iin in d Kanalisation spüele. Guet, dir häit rächt. Me chönnt au es Fritto misto di pesce druus mache. Aber gälled, es bruucht halt schone Huffe deere chlyyne Fischli.
Aso, überlegged öich guet, wenn dir öich wäit es Huusdier zuedue. Doo none chlyyne Fingerzäig. Über Elefante haani nüt im Dierschutzgsetz glääse.

Wullechnöiel – Wollknäuel
muudere – kränkeln