Wo füert das no aane?
Jetz hed doch do letschti dr Noochbersbueb würklich mit emene Glettyysen und emene Glettibrätt gspiilt.
Aso, ich wäiss nid! E Bueb, wo mit emene Glettyysen ummehandiert. Wenn das numme guet uusechunnt.
Früener hed men as Bueb, nummen esoo zum Sääge, de Mäitli e lääbigi Blindschlyychen ins Fürtech gschmuggled. S Gröscht isch aber albe s Spräänge mit Karbid gsi. Me hed mit emene roschtige Naagel es Loch in en Ovomaltinebüchse gmacht. E Bolle Karbid dryydoo, druuf gspöid. Dr Deckel uf d Büchse doo und bim Loch, wos Gaas uusechoo isch, aazündet. Es isch e woori Fröid gsi, wie s denn amme dr Deckel ewägg gjaggt hed.
Und hütte?
Jo, hütte chunnsch käi Karbid me über, d Ovomaltine ghöört den Ängländer und d Buebe glette Glettifalten in d Baadhoose. Und under öis: wenn häit diir s letscht Mool e Blindschlyyche gsee ? Ebe.
Fürtech = Schürze
Glettifalte = Bügelfalten
