Under dr Duschi settsch jo äigedlig chönne uusspanne.
Aber nütt doo under dr Duschi ummeduudele. Duurend mues ich draa dänke, as i nach em Dusche nütt vergiss. Dr Chromstaal z poliere, d Blättli abzdröchne, d Fuege mit em Zaanbürschteli z fääge, dr Duschvorhang zruggzmachen und uufbasse, as käini Rümpf git, dr Deppech vor dr Duschi uufzhänken und dr Booden uufzzie.
Aber nit gnueg mit Ungmach. Jetz spiilt no dr Duschischluuch verruckt.
Immer, wenn ich dr Schluuch an d Halterig ghänkd haa, ringled er sich zääme wien e Blindschlyychen und es schloot mir dr Brausichopf an d Biire.
Jetz han ich vo myynere liebe Frau dr Befääl überchoo, nach em Dusche dä blöösinnig Schluuch immer militärisch graad uuszrichte, as e Gattig macht!
Wenn ich denn amme so am Schluuch Uusröllele bi, dänk ich immer wiider, jetz räächt sichs halt, as ich nie in dr Füürweer gsi bi.
ummeduudele = rumtrödeln
Deppech = Teppich
