So äinisch under em Joor schiesst miir d Häx in Rugge.
Mäischtens bassiert daas, wenni dusse haa müese jätte. Doorum häi miir jetz alli Pflanzen uusgrissen und der Gaarte betoniert. Klaar. Häi mer natüürlig nit. Aber es weer emool öppis, woni mit myynere Liebschte müesti z Boode reede!
Jetz lysch also doo. D Häx syyrached im Ruggen umme. De chönnsch di chuum no rüere. Wiene hiinige Chääfer strecksch alli Vieri voo dir.
Die eerschti groossi Üebig, wo denn uf di zuechunnt, isch die, wenn den uf s Hüüsli settisch. De loosch di wiene Sack Häärdöpfel us em Bett lo gheien und chramslisch Richtig Baadzimmer. Nach öppe zwänzg Minute cheersch aber wiider um, wil de meerksch,
as in deere Verfassig unmööglig chönnsch uf e Droon chläädere. Pflätschnass vor Aasträängig lysch nachere guete Stund wiider im Bett. S Äinzig, wo der jetz in Sinn chunnt: Guet, häi mer der Groosmueter iire Botschamber nit ewägg gheit!
Am Moorgge denn – das häisst, wenn de lääbig dervoochoo bisch – lüttet die Liebschti em Dokter aa.
Richtig. Dir häit s gmeerkt. Jetz foot s Läid eerscht richtig aa.
Der Huusarzt isch in de Ferie. Natüürlig, er hed s au verdient. Syy Verdrättig hed grad uusgrächned hütte frei. Natüürlig, au äär hed s verdient. Aber es chaa nüt bassiere. Nöimen in der Mongolei häig en Arzt Nootfalldienscht. Nachere churze Rücksprooch mit der Frau beschliess iich, nit in d Mongolei z räise.
Nacheme Zyttli, wo miir aber wienen Eewigkäit voorchunnt, hed d Frau denn aber doch non e Dokter gfunde. Äin, wo Zytt hed, miir e Sprützen in d Verlengerig vom Rugge z jätte, ass iich wiider zgrächtem chaa fuerwäärche.
Er cheemi graad, häig er gsäit, der Dokter, säit myy Liebschti. Nach vier Stund – ooni ass iich e Dokter gsee haa – froog iich d Frau ganz schüüch, öb ächt öppis mit em – i chumm grad – chrumm gloffen isch.
Si lütted no äinisch aa. Underäinisch foot si am Deelifoon zimmlig lut uf Hoochdütsch afo reede.
Wo si an s Chrankelaager zrugg chunnt, hed si ganz e roote Chopf und säit: der Dokter häig der Stroossenaame mit öisem Gschlächtsnaame verwächsled und syg anes falschs Oort aane. Aber er cheemi jetz würklig glyy.
Glyy isch denn in zwee Stund gsii. Denn isch er choo, der Dokter. Es isch e stattlige Maa nöimen us Afrika gsii. Näi, nit wääge däm isch er so lang nit choo. Zeerscht säit er, er zäigi miir e baar Üebige für e Rugge. Er hed denn aber wäidli gmeerkt, ass jetz nit der Momänt isch, Freiüebige z mache.
Iich haan iin, nit uf de Chnüü, aber uf em Rugge bätte, er selli miir äntlig e Sprütze gee. Woner d Kufferen uufmacht und iich die Sprütze gsee, haani e churzen Augeblick dänkt, hoffentlig hed dää nit syys Wärchzüüg verwächsled und hed nummen öppis gege
d Muul- und Chlauesüüchi mitgnoo.
Aber es isch alles guet gangen und miir isch glyy vill wööler gsii. Numme d Füdlebacke hed non e chlyy wee doo. Woni denn wiider haa chönnen uufrächt goo, haani ganz churz überläit, wie daas ächt uusechoo weeri, wenn iich am Verblüete gsii weer…
Aber glaubed mer s. Iich haa nit lang drumumme gstudiert!
syyrache – sich sehr schnell bewegen
Droon – Toilette
