Jetz isch dr Schmiid aber schlussemänd doch no zümftig zwüsche Hammer und Ambos groote. Alli hacken uuf iim umme. Scharfs Gschütz wird uufgfaare. Es wird uf alles gschosse, wo sich nit gschnäll gnueg cha in Luftschutzchäller rette. Jede, wo nummen einigermasse chan e Flinten in de Chlöbbe heebe, bülvered uus em Hinderhalt.
Und wie gwoond, wenn dr Nääbel wiider ewägg isch, chömme die ganz Gschyyde vo dr Buurepartei hinder de Gebüsch füren und bäägen in dr Geegend umme: Sie häiges jo immer gsäid und gsee cho.
Halt wie mäischtens – erscht hindenoo!
Jetz müessi dä Maa ewägg. Me chönn dä de Soldaate nümme zuemuete.
Dumm numme, as genau die dr Schmiid vor langer Zyyt no as guet befunden und iin as Bundesroot vorgschlaage häi.
Es isch halt schon es chäibe Züüg, wenn me son es churzes Gedäächtnis hed. Oder no schlimmer, e gaare käis!
bülvere = schiessen
gwoond = gewohnt
hindenoo = hinterher
