S Inneband, s Chrützband, s Usseband, s Karpalband, s Chnüüschyybeband und s Gebäärmuetterband. Das si alles Bänder, vilicht ooni s Gebäärmuetterband, won e Schütteler bruucht, wenn er guet will schutte. Aber s wichtigscht Band für e Schütteler isch?
Richtig. Dir häits verroote. S Hoorband!
Jedesmool, wenn s nämmlig e Schütteler uf e Sack haut, ruugelet er sich zerscht wien en aagschossene Muuni uf em Raase. Denn stoot er lamaaschig uuf, nüeld im Hoor umme und büscheled as erschts syy Höiel. Wenn denn dr Tschuppel wiider gattlig lytt, räiffled er wiider ummeäänand wien es Wiiseli.
Aber am beschte gsäie die Schauspiiler denn amme nach em Spiil uus.
Denn chlääben iine d Strääne wie wääli Wäiefäckten an de Chöpf. Es maant mi e chlyy, wie mir as Bueben enander albe im Brunnedroog dunggd häi.
ruugele = wälzen
lamaaschig = langsam
dungge = tauchen
