Revoluzzer sy si äinisch gsii – d Baselbieter. Hütte sy mir, oder ämmel die mäischte – numme no laami Schloofchappe.
Jetz wird doch hür öise Kanton 175 Joor olt. Verdooria! Aber e Fyyr weer e Fyyr.
Guet. S äint oder ander Chääferfescht heds scho gee.
Nöime hed e baskische Duudelsackpfyffer in dr Wältgschicht ummegüggled oder e baar Landröötene und Landrööt sy pflätschnass uf schlipfrige, römische Muuren ummegchläädered.
Nummen e baar Mitgliider vo der Partei, jo die mit zwee, äim, gar käim oder emene halbe Bundesroot (es isch au schwiirig, nundefaane) häi d Sach ärnscht gnoo. Die Manne mit Schnäuz häi dr bi dr Hülfteschanze, dört, wo vor 175 Joor d Rammel gege d Bebbi butzd häi, gfyyrd.
Und d Regierig? Ebe!
So chunnts halt uuse, wenn die grosse Mäischter – die ehemooligi Schnurpfidanten und dr ehemoolig Schoofbuur vo äänen an dr Sissecherflue – nümmen im Regierigsroot zum Rächte luege…
Verdooria = verflixt
schlipfrig = glitschig
chläädere = klettern
