Es goot also. Me cha au mit achtzgi no wyysi Entschäid felle.
En ehemoolige Landrootspreesi und Buur hett d Naasen ändgültig voll. Er dräädet – näi, nit in dr Döibi – us dr SVP uus. Jetz syygi dr Chessel gflickt und gnueg Höi dunde. Me chönni s Fueder nit allewyyl no mee überlaade. Das setti de ehemoolig Chuehirt us em Sanktgallischen äigedlig au wüsse, hett dr ehemoolig Buur vo Zeglige gmendet. As äine, wo im Kanton Züri woont und im Chlütter schwimmt, nümme so rächt wäiss, wie me sich gattlig uffüert, cha me jo no verstoo. Und as e Gstudierten us Gälterchinde nit immer dr richtig Doon drifft, an das häigi er sich langsaam gwöönt. Aber as die chruttige Cholderi jetz no am Scheff vo allne Soldaten ummenöörggele, das syygi jetz äidüttig z vill und er gheit d Höigaable, oder besser gsäit, dr Bättel aane.
Dir gsäiet, me cha au im Olter no gschyyder wäärde.
Wyyshäit = Weisheit
chruttig = überheblich
