Richtigi Fründ

Es hed alles guet aagfange.
E liebi Fründyn – käi Panik, Frau, es isch nit esoo, wie duu dänksch – drei liebi Fründ und iich häi beschlosse, zääme mit em Wello in Schwaarzwald z faare. Guet, jetz chaa me sich frooge, worum men um s Verwoorgge mit em Drooteesel mues im Schwaarzwald ummechniempe. Woorschyynlig chunnt daas doo dervoo, ass miir jo alli irgend nöimedure Nomaaden oder eemooligi Galeere-Ruederer syy. Oder in jeedem Maa, und aaschyynend au bime Däil vo de Fraue, isch none Gutsch Gladiatorebluet umme.
E Gladiator und e Galeere häi mer denn aber doch käini byyn is ghaa. Aber süscht syy mer technisch uf em nöischte Stand gsii. D Pnöö und d Faarer häi gnue Luft ghaa. E Däil häi d Uusfaart mit rasierte Bäi und gschoorene Chürpse – Millimeeterschnitt – in Aagriff gnoo. S hed richtig windschlüpfrig dryygsee. Soo uusgrüschted syy miir loosgchäibed.
Mir syy miteme soumeessige Garacho über d Fälder und dur d Wälder bräddered. Miir häi dur dieffi Chrächen und über soumeessig hööchi Hübel müese. Fascht esoo, wie früeijer d Hunnen uf iiren Erooberigsfäldzüg. Es isch e woori Fröid gsii.
Und denn isch s cho säiche. Was häisst säiche. Bindfääde hed s gschifft. S Wasser isch äim oobefer zue de Schue yynegloffen und undefer wiider uusedropft. Nach e baar Kilomeeter hesch uusgsee wiene Grenadier nach der Kampfbaan. Und denn isch zue allem Unhäil aane bi miir no d Luft uuse. Aso, nit äigedlig bi miir. Näi, es hed aaschyynend es Loch im Schluuch ghaa. Myy erschte Gedanken isch gsii: Das chunnt dervoo, wenn me wie Halbverruckti dur d Geegend sout. Woorschyynlig isch der Gummischluuch gschmulze.
Soo. Und jetz chömme myyni guete Fründ ins Spiil. Wil die mii kennen und wüsse, ass iich technisch uf em Stand vo de Höölebewooner bi blyybe stoo, häi sii sich sofoort kameradschaftlig um dä Schaade gchümmered. Um s Ummeluege häi sii myy Göppel underopsi uufbockt und afo am Pnöö ummeryysse. Um s Verwoorgge hed dä Gummi aber nit vo der Felge welle loo.
Myyni Mechaniker häi vor luuter Morggsen alsfott rööteri Grinder überchoo. Iich häig e Säich yygchauft. Äin hed sogaar gmäint, der Pnöö syygi glyych läätschig wie der Faarer. Wil iich die aagspannti Laag nit no mee haa wellen aahäize, haani s Muul ghalte. Denn, mit vill Fluechen und Gnippere, häi s myyni liebe Fründ gschafft. Der nöi Schluuch isch druff gsii.
Es hed chönne wyttergoo. I haa für mii bim Wytterfaare so dänkt: Wenn die amene Formel-1-Renne soo lang hätte, bis sii e Pnöö gwächsled häi, weer s Renne lengschtens verloore. Aber wie gsäit – i haa s numme dänkt.
Zoobe haani denn myyne liebe Fründ, as Dank für iiren Yysatz, e gattligi Guttere Badische Suurgrauer Spootlääsi offeriert. Ooni z muulen und d Auge z verzie, häi sii alles uusdrunke. Woorschyynlig syy sii äifach z müed gsii zum Meerke, was für e Haagbrünzler ass sii drinke. Numme znacht im Bett syy sii allwääg no lang wach gläägen und häi drüber noochedänkt, was jetz schlimmer gsii isch: Der Raadwächsel oder der Ranzechlemmer.

chniempe – schwerfällig fahren, gehen
Gutsch – Schwall Flüssigkeit