E stimmt äifach nit, as d Fraue mit nütt zfriide syy.
Dir hättet d Auge vo myynere Frau müesse gsee, wo si e nöie Staubsuuger überchoo hett.
Richtig glücklich isch si.
Nit e Pelzmantel oder es Diadem bruuchts. Näi. Es cha zwüschenyyne au emool e Raasemääier oder e Boormaschiine syy.
D Zytte syy nämmlig umme, wo dr Maa d Neegel yyschloot oder d Schytterbyygi bout und d Frau d Chinder ins Bett duet. Hütt mache beedi beedes – ämmel dr Maa.
Ich gönn aber myyner Liebschte das glitzerige Gräät. Uufbasse muess ich äifach, as mir nit die letschte Hoor vom Chopf chutted, wenn si in dr Stuuben umme handiert. Ich lueg au immer, as ich iire gläitig zum Wääg uus chumm. So chaa si in d Egge suuge, ooni as iiren öbber dryyreedt. Und doorum isch myy Frau au deerewääg zfriide.
Wenn dir nämmlig emool gsee hättet, mit wie vill Liebi si dr voll Staubsuugersack wächslet, denn wüssdet dir, vo was ich schwätz.
Schytterbyygi = Holzbeige
glitzerig = glitzern
deerewääg = so
