Nundefaane. Doo haan iich aber Auge gmacht.
E richtige Japaner. Ooni Samuräischwäärt, derfür miteme souscharfe Sushi-Mässer. Dää Heegel hed sone soumeessigi Scherffi ghaa, ass mit däm ooni Probleem hättisch chönne jeedes Naasehoor äinzel in vier glyychmeessigi Stück däile.
Aber i schwäiff ap. I bi jo nit imene Schöönhäitstämpel uf Bsuech gsii. Chömme miir wiider zum japanische Mässerakrobat.
Es hed mii halt emool wunder gnoo, wie me s aagattiged, sones dunners Sushi z mache.
Doorum haan iich e Kurs buecht, wo öppe so vill gchoschted hed, wie der Räscht vom Lääbe jeede Daag e Blatte voll Sushi – ämmel fascht. Miir syy luuter Manne gsii. Woorschyynlig wüsse d Fraue sit Geburt, wie men e raue Fisch ines schliiferigs Seetangblatt wiggled.
Der Mäischter hed öis Knilchen aaglächled und ineren unglöibige Schnälli verdüted, was der Uursprung vo Sushi isch. Miir häi fründlig zrugg glächled und esoo doo, as hätte miir öppis verstande.
Denn isch s zgrächtem loosgange. Der Mäischter hed syys Mässer gwetzt, ass d Spöön gflooge syy und imene soumeessige Tämpo afo der Lachs in glyychmeessigi Stückli schnyyde.
Won iich gsee haa, was für dünni Schniifel dä asiatisch Mässerwärfer schnyyded, isch miir zeerscht d Notfallstation vom Kantonsspital Lieschtel und druufaaben e verfotzledi Bluetwurscht in Sinn choo. Aber dää Maa hed syys Handwäärch verstande.
Dää hed die stattligi Sytte Lachs in soo huuchdünni Schyybe gschnääfled, ass durduure hättisch chönne d Volksstimm lääse. Denn hed er e halbe Thunfisch uf die glyychligi Aart und Wyys zämmegschnääfled, ass öis fascht s Augewasser choo isch.
Zum Schluss hed er der fertig gchochti Ryys us em Ryys-Chocher gchnüübled. Dää isch esoo bappig gsii, – der Ryys, nit der Japaner – ass dermit hättisch chönnen e Huuswand verbutze.
Wil miir aber nit in der Muurervoorleer gsii syy, hed der Japaner der Ryys au nit as Ussebutz bruucht. Näi, er hed mit der Bappe Würscht gformt, uf es Seetangblatt büscheled, es Stück Fisch druuf byygeled und s Ganzi zumene gattlige Päckli gformt. Emene Sushi halt.
S hed ganz äifach uusgsee.
Denn syy miir Aafänger draa gsii. Miir häi mit öise Chnölpifinger brobiert, öb miir die glyychlig schööne Päckli aanebringe. Nach öppe zää lange Minute, drei verstuuchte Finger und emene Chrampf im Underaarm, haan iich uufgee.
I bi inen Egge ghockt, haa amene apverheite Sushi – woni gmacht haa – ummegchöit und immer wiider e Schluck vom Ryyswyy gnoo. Im Stille haan iich mii immer mee afo frooge: Was chäibs hesch jetz äigedlig gleert?
Der nööchscht Daag bini druuf choo. Öppis won iich an däm Ooben aber für d Eewigkäit mit überchoo haa: S nööchscht Mool lütteri numme no drei Dasse vom waarme Ryyswyy!
aagattige – anstellen
Spöön – Spähne
