Myys allerliebscht Göttimäitli wett gäärn mit mir gon es Chaschperlitheater luege.
Das bräicht si aber guet, han ich zuen em gsäit. Denn gönge mir zäämen uf Bäärn. Dört oobe schlöie sich im Momänt erwachseni Mannen und Fraue gegesyttig uf de Chöpf umme.
S Göttimäitli luegt mi mit grossen Augen aa und frogt mi, öb denn au es Krokodil und e Polizischt an dr Uuffüerig mitmieche?
Nit äigedlig. Aber en eemoolige Chüeier, e Chnächt, es Wyybervolch, e baar Gschwälli, Hampelmanne, Brüeli und sünscht non e baar schreegi Vöögel syy d Hauptfiguuren in däm Druurstück. Im Hindergrund luure non e baar Milchbueben und Joomerchreeze. Das syy den die, wo noochaanen immer scho gwüsst häi, wies voraanen uusechunnt.
Aso schon es wäärschafts Chaschperliteater halt!
Und wäisch, was s beschten isch, han ich s Göttimäittli gfrogt. Dr Chaschperli, wo hindeduure chääschperled, häisst im richtige Lääben au grad no Chaschper.
Gäll, Zuefäll gits!
eemoolig = ehemalig
Chüeier = Kuhhirt
wäärschaft = währschaft
