S hett Zytte gee, do syy Choorp- und Pfanneflicker us em Elsass und em Baadische vo Huus zu Huus zoogen und häi hiinygi Chöörb und Pfanne gflickt.
Mäischtens häi sie vill z vill für d Aarbet verlangt, und d Pfanne hett immer non e schreege Boode ghaa. Si hett ämmel druufaabe glyych schlächt ufs Pfanneloch basst wie voraane.
Si häi immer s Nöischte gwüsst. Wär mit wäm, wär mit wäm nümm und e huffen anders.
Nääbenyyne häi si no Chupferblätz, Pfanneriibel und andere Ramsch verchauft.
Hütte chaufsch dir dr Pfanneblätz oder s Grillbürschteli im Supermäärt. Doorum syy d Choorp- und Pfanneflicker au fascht uusgstoorben oder häi käi Aarpet me.
Ich hätt den aarpetsloose Pfanneflicker e Root. Mäldet öich doch bi dr SBB. Dört gits immer Büez. Es chönnt denn ändlig äin die Zuugsdüüre flicke. Die isch nämmlig öbbe scho sitt drei Wuche hii.
Choorper = Korbflicker
Pfanneloch = Öffnung im Holzherd
Pfanneriibel = Pfannenreiniger aus Metall
