D Faasnecht uf em Land

So um d Faasnecht ummen ischs ganz häikel, wenn den as Rammel z Baasel schaffsch. Wenn s um iiri drei schöönschte Dääg goot, verdräits nämmlig nütt. S foot scho aa, wenn di äine froogt, wenn denn uf em Land äigedlig Fasnacht syygi? Wenn denn säisch, das syygi ganz äifach z merke, d Städter häige mit öis Faasnecht, blyybt de mäischte dr Ootem ewägg. Wenn er denn wiider richtig cha schnuufe, goots los. Z Baasel häig me scho drummlet und pfiffe, wo mir Rammel noonig emol richtig häige chönnen ufrächt laufe. Uf em Land döige mir dänk no uf umboute Mischtchüübel ummechläpperen und uf handgschnitzte Haselstäcken ummebloose. Um iin e chlyy z beruige, underbrichsch iin, wenn er äinisch Schnuuf hoolt und säisch, fliessend Warm- und Chaltwasser häigi mir aber scho länger! Er luegt di gross aa und frogt di, was das mit der Faasnecht z due häigi? Äigedlig nüüt. De häigsch iin numme wiider e chlyy wellen aabechüele. Um dä Fasnachtsfetischischt wiider es bitzeli uufzmuntere, säisch ganz schüüch, de syygisch au scho am Umzuug z Baasel gsiii. Doo hesch iin aber scho wiider uf em lätze Fuess verwütscht und s goot vo nöiem loos. Was häisst doo Umzuug? Das syygi nit wie uf em Land, won e baar verchläideti Güllerugger in dr Gegend ummetschiengge. Z Baasel häissi das Cortège. Wenn di denn getrousch z sääge, Cortège syygi jo französisch und öb d Faasnecht emänd vo Frankryych importiert syygi, isch dr Zapfen ändgültig ab. Aber so richtig uf d Palme chönnsch en bringe, wenn d frogsch, öbb me däm Blämpper, won iim am Chraage bambelet, Abzäiche säit? Er chunnt e rote Kopf über und stiert di uus chlyynen Äugli aa. Däm sääg me Blagetten und nit Abzäiche, mir syyge doo nit bi de Schwoobe. Guet, wenn ich alben an Umzuug, oder denn halt eben an Cortège uf Baasel gang, sy d Waggis uf de Wääge fascht die äinzige, wo nit hochdütsch schnuure – wenn sie denn schnuure, d Waggis. Woorschyynlig het er vor luuter Döibi au nit ghöört, as me bis öis Rammel au Blagette säit. Dr Gnaadestoss chönnsch iim denn gee, wenn de säisch, z Luzärn syygi d Faasnecht lüschtiger as z Baasel. Natüürlig hesch iin jetz total uf em falsche Bei verwütscht. Er brüelt di aa, dört geebis jo numme so biirewäichi Guggemuusigen und kaini Drummler und Pfyyfer. Und e Faasnecht ooni Drummler und Pfyyfer syyg wien e Lääberwurscht ooni Wyybeeri. Denn tschalpt dr äigedlig Erfinder vo dr äinzig woore Faasnecht mit gschwelltem Chambe dervoo. Doo gwaarsch underäinisch und s lauft dir ganz chüel dr Äckten aabe: Äigedlig isch d Faasnecht z Baasel e doodärnschti Sach und überhaupt nit luschtig. Aber das muesch de Bebbi jo nit unbedingt uf d Naase binde.