Der Schaaggi het Geburtsdaag!
Dr Schaaggi? Kei Aanig, wär dr Schaaggi isch. Aber allem Aaschyyn nooch, isch er e soumeessig wichtigi Person.
Hütt am Morgge, im Zuug uf Basel, hett ämmel s Gschpuusi vom Schaaggi so luut ins Deelifoon bäägget und iim alles Gueti zu syym Geburtsdaag gwünscht, as fascht d Schyyben usegheit syy. Es isch scho erstuunlich, was men uf dere churze Faart alles cha blaadere. Und mir hei alles dörfe mit aaloose. As sie iin hütte z Nacht mit emene nöie Nachthemmli überrasche will. Zerscht geebis aber non e zümftigs Ässe. Woorschyynlig Pizza vom Pizzataxi und e Guttere Haagbrünzler. Öbbis, wo me halt mit em Deelifoon cha bstelle. Sie syyg scho ganz zum Hüüsli us und fröie sich scho jetz uf hütte z Oobe. Mir au!
Guet, eigentlich intressierts niemer so richtig, was die zwöi mitänand am Deelifoon blöödele. Aber ich finds einewääg wichtig, as mir an deere Stell drüüber greedet hei.
bäägge = herausposaunen
Haagbrünzler = saurer Wein
