Eigetlig blyybt ammen am Schluss numme no d Hut füür – ämmel, wenn dr Chlöpfer rau ässisch. Und genau wääge deere Hut – es goot uf käi Chuehut – isch dr Deufel loos. Plötzlig gramselets numme no so vo Chlöpferexbäärte.
Dr Chlöpfer isch vor em Uusstäärbe, sääge sie. Nach em Verschwinde vo de Dinosaurier allwääg s zwöitgröschti Ungfell in dr Wäältgschicht.
D Wurschter schlöien Alarm. S häig käini Däärm me, wo me s Chlöpferbräät chönni dryystungge. Was häig me nit scho Allergattigs uusbrobiert.
Giraffedäärm – schöön lang. Panzernaashorndäärm – schöön dick. Spitzmüüslidäärm – schön dünn und Bääramsledäärm – gits vill, syy aber z chlyy.
Das isch jo alles guet und rächt.
Numme, was in d Wurscht chunnt, isch, so wies uusgseet, nit so wichtig und nimmt niemer wunder. Und wäägen all däm Gschyyss ume Darm loosch denn allwääg in Zuekunft d Wurscht füür und ässisch numme no d Hut.
Hut = Haut – in diesem Fall, aber Darm
gramselet = wimmelt
Ungfell = Unglück
Bääramsle = Ameise
