Wenn dir schon emool dört gsi sytt, denn wüsset dir, was ich mein.
Also, dört won ich mein, stoot dir duurend nöimen es Kameel im Wääg. Und wenn denn som ene Unghüür no uf d Chlaue stoosch, bläärts die giftig aa. E huffe Lütt in komische Gwäänder, tschalpen änander uf de Flossen umme. Es wird wild duuränander bällitschiert. S schmöckt nach Chnooblech, Schweissfüess und nach abgstaandnigem Brunz. Und irgend ein, brobiert dir immer, irgend e Ramsch uunderezjuuble. Es riisigs Duuränander. S macht die halber lätz und de wirsch fascht wirppelsinnig.
Und jetzt häits dir sicher verroote? Richtig. Ich schwäätz vom ene orientalische Määrt.
Und öbbe genau so chunnsch dr im Momänt z Basel uf em Baanhoof vor.
Numme verchauft dört kein Kameel. Nei. Wie dr Billig-Jakob, brüelt ein dr ganz Daag in dr Baanhoofhalle umme: Blagette, Blagette, Blagette….!
Blagette = muess ich allwääg niem erklääre
tschalpe = schwerfällig gehen
bällitschiere = zetern
blääre = blöken
wirppelsinnig = wahnsinnig
