Ohäie, jetz cha dr Cholderi nümm wyyter im Bundesroot choldere.
Dr Räscht vom Staab cha d Chralle wetzen oder sich wiider uufbluuschtere wie Güggel. Dr Cholderi duet iine nümm eis- ums andermool d Hüener yy. De Chätzer het halt gwüsst, wie me de Müüs dr Späck duurs Muul zieht. Wenn er albe so richtig in Faart cho isch und im Züüg ummegsyyrachet het, hei d Müüsli dr Chopf gschwind yyzooge und syy im Loch verschwunde. Ängschtlich hei sie us em Muusloch güggelet und ghofft, as ene dr Cholderi nit uf e Schwanz stoot.
Aber syy mir doch graaduuse.
Schlimm isch nit dr Cholderi gsi. De hett eifach nit anderscht chönne. Schlimm si die, won em Cholderi alles glaubt häi. Wie Hampelmannen und –fraue häi sie mit em Chopf gnickt und zue allem Joo und Amen gsäit.
Jetz chönne d Schyysser wiider us em Loch choo und e grossi Güüge füere.
Cholderi = Polterer
Staab = Gremium
Chätzer = Schlitzohr
