Es hett efangen immer weniger Personal, wo in de Züüg zum Rächte luege.
Do letschti hett doch dr Lokifüerer duuregee, es sell doch bitte ein vo de Faargäscht d Zuugsdüüre zuedue. Erscht denn chönni er nämmlig wyyterfaare.
Wie chunnt ächt das no uuse?
Fertig luschtig mit gmüetlig in dr Gegend Ummegutschiere. D Bryysen uufedue ischs einte. Au du as Reisende muesch dyy Byydraag ans Defizytt vo der SBB leischte.
Glyy muesch dänk d Fänschterschyyben in de Züüg sälber butze, mit emene gruusige Schyyssibürschtli d Schüssle fääge, dr Gang mit emene füechte Lumpen uufnee und wenn s wiider drochen isch, no churz spöönle, denn die späckige Bolschter suuge, bim Uusegoo dr Bapyyrchorb leeren und zletschtemänd no d Loki aabestrupfere.
Vo wääge, dr Chund isch König. Es chunnt no so wytt, as dr bim Zuugfaare muesch e Butzfrau zuedue.
Heit e gueti Faart zääme.
sälber mache = selbst machen
ummegutschiere = in der Gegend rumfahren
gruusig = eklig
