Noochaane isch men immer gschyyder. Oder anderscht umme: Wenn dr Hund nit gschi… hätt, hätt er dr Haas verwütscht. Woorschyynlig juschtemänt esoo muess es «Eusem» am letschte Sunndig vorchoo syy. Wien e gschlaagene Hund isch er im Zügs ummedrottet und isch nümme noochechoo, was mit iim gschee isch.
Wo sie iin in d Waal gschickt hei, hei sie iim versproche, sie steechen alli hinder iim. Und jetz, won er zrugg luegt, isch kei Sou me z gsee.
Dr Grossätti hett albe gseit, me chönni nie gnueg vorsichtig syy bi dr Uuswaal vo syyne Früünde. Chuum hesch nämmlig dr Rugge drüllt, wirsch versecklet.
Woorschyynlig hett die Partei, wo duuraane numme schwarzi Schoof gseet, nit gmeerkt, as me halt e chlyy übers eigene Gatter sett uuse luege. Denn hätte sie nämmlig gmerkt, as «Euse» e Lieben und e Nätten isch. Aber das längt halt nit, in ere Wält, numme mit schwarze Schoof.
noochaane = nachher
juschtemänt = genau
