Myys Göttichind isch es Gschyyds. Wäge däm ischs jo au myys Göttichind.
Und worum isch myys Göttichind jetz son es Gschyyds? Wills mir allewyyl so chutzligi Frooge stellt.
Wie au letschti wiider.
D Muetter vom myym Göttichind het jetz au mit «Nordisch Walking» aagfange. Wunderfitzig wie Chinder halt emol syy, het myys Göttichind s Mami mit Frooge halber lätz gmacht. Worum as si son e satti Hoosen aaheigi? Worum as d Däächlichappen eson e blaarigi Farb hett? Für was si denn di gspässige Stäcke bruuchi?
S Mami het iim alles lang und breit erklärt. Das, wo si do machi, sygi Sport und däm seit me nöimoodisch «Nordisch Walking».
Myys Göttichind hett groossi Augen gmacht umd mi druufaabe gfrogt: Du Götti, wenn s Mami jetz Richtig Süüde „walkt“ , heisst s denn immer no „Nordisch Walking“ ?
Gueti Froog, nit?
allewyyl = immer
chutzlig = heikel
letschti = unlängst
wunderfitzig = neugierig
