Äntlig. Die nöie Waartehüüsli uf em Bahnhof z Sissech syy fertig. Jetz muesch bim Huudelwätter nümme dussestoo und dr d Biire lo verseiche.
Häärzig gseets us, s nöi Hüüsli. Es hei öbben ölf und e halbe Mensche drinn Blatz und wenn men e chlyy zäämestoot, cha me no zwee mee yynebyyge. Wenn eso im Gmoscht stoosch, weisch, wie sich e Sardine in dr Konservedoose füült – halt nummen ooni Öl.
Hindedraa chiichet dir ein es halbs Chnooblechfääld in Äckte. Ein mit em Blauhueschte bäärzed dir d Bazillen um e Chopf. Nääbedraa schnützt ein wien es Waalross ins Naasduech, as fascht d Glasschyybe vom nöie Hüüsli uusejätted. Dr Jung mit em MP3player, füert sich uf wie in ere Disko uf em «Ballermann» z Spanie und vornedraa drückt dir eini ständig iire toupierte Höiel ins Gsicht.
Aber wie gseit, s Hüüsli isch würklich syydig.
yynebyyge = hineinschichten
Blauhueschte = Keuchhusten
schnütze = schnäuzen
MP3player = Ausländisch. Maschine, die vorwiegend junge Menschen davon abhält, mit- einander zu reden
