De hesch di grad ebe gmüetlig gsäädlet und fröisch di uf e gattligi Muchle Kaffi. Um di umme pfuure d Servierfrölläin wie ufgschüüchti Wäschpi.
Denn goot Düüren uf und d Familie XY chunnt mit iire drei syydige Bäälg ins Kaffi gstürmt.
Die Chlyyne bringen im gstreckte Galopp und mit Gebrüel dr Chinderspiilegge under iiri Fittich. Scho glyy fliege die erschte Teddybäären in dr Gegend umme. Denn bänglet dir dr Chleinscht vo dere Rasselbandi en usgfranste Stoffelefant an d Chürbse, und dr Mittler wüüscht dir mit em Schwanz vom handgliismete Duusigfüessler s Kaffi vom Disch.
De Eltere stiere derwyyl in d Zyttig, as würd si s ganzi nüt aagoo. Ich chas verstoo, schliesslich bruuche si au einisch iire Friide.
Nääbenyyne: Bim Uuselaufe bin i denn no uf em Gaggo, wo dr Gröscht usgleert het, usgschlipft.
baschge = balgen
Muchle = Tasse
pfuure = schwirren
