Es hed e Zytt gee, do syy miir Manne no Manne gsii.
In Fällchläider, baarffis und miteme Chnüppel bewaffned, syy miir im Uufdraag vo de Fraue go Löiemüüli sammle.
Bis hütten isch daas zimmlig glyych bliibe. Miir Manne göngen immer no im Uufdraag vo öisne Frauen irgend öppis go sammle – numme nümm baarffis und in mee oder weeniger gattlige Chläider.
Jetz kenn iich doo äine, wo sich immer no wiene Sammler us der Bronzezytt uuffüert. Gseet er nämmlig nöimen en Apfallchübel foot er wiene Sou im Rüebacher aa im Güsel ummenüele. Er nusched und grübled, ass äim richtig Angscht macht.
Und was er alles eso häi schläipft! Es verisses Lyynduech – chönnt me no für d Chluuriverbrennig bruuche. Drüü Spaanchöörbli – d Daameriigi chaa die sicher für die nööchschti Tombola am Durneroobe bruuche. 34 Hunderterneegel – wenn me die halbiert, git daas undenewägg 68 Füfzgerneegel. Es Dotzed halbverfuulti Flecklig – für s 1.-Auguschtfüür.
Denn bsuecht er jeede Dröödlermäärt in halb Europa. Nöime finded er none Faasnechtsblagette vo Honduras – wo iim no in der Sammlig gfeelt hed. Oder es uusglyyreds Lyyrum – d Frau chaa jo denn dehäi es Löiemüüli dryypflanze.
Isch nöimen en Altmaterialverchauf, isch äär as Eerschten am Oort. S häisst jo nit vergääbeds: Wäär zeerscht bi der Müli isch, maalt zeerscht. Er füllt syy Göppel mit Altyyse, roschtige Stäägegländer, verboogenen Yysestuelläänen und e baar Hundert verdrüllte Chrüzschruube.
Er spanyyfled immer im Zügs umme, öb nöimen e Büni oder e Chäller gruumt wiird. Döört grabt er denn immer ganz spezielli Sache – miir würde däm Grümpel sääge – uus.
Sit Nöischtem isch er aber ganz us em Hüüsli. Er hed nämmlig vernoo, ass es uf de Fidschi-Inslen au e Karneval gäbi. Jetz wäärwäisst äär, öb er die fidschianische Palmwäädelkarnevalsblagetten au sell afo sammle.
Syy Frau mäint, eender nit! Iich au!
baarffiss – barfuss
nusche – herumstöbern
