Im Underschiid zum Chueflaade cha me dr Ooschterflaade ässe. Er wird us Griess und Wyybeeri gmacht. Sit nöischtem gits e Version, wo men an Stell vom Griess Ryys nimmt.
Numme guet, mues das my Groossmuetter nümm erlääbe!
D Ooschterfläädli ghööre nit in d Suppe, dört dryy duet me Fläädli. D Fläädli wärden au nit us Griess gmacht. Nei, me macht us Eier, Määl – nit vo dr Uusmaalede -, Milch und e chly Solz e Däig, bräägled in dr Brootispfanne dünni Ammeletten uuse und schnyydet die in fyyni Streiffe. Dorum heisst denn d Suppen au Fläädlisuppe. Were Chuefläädli drinn, würd d Suppe…., aber löie mir das!
Wenn ein e Flaaden in dr Chürbse het, denn meint me nit en Ooschter- oder Chueflaade, nei, denn het er ein übere Durscht glütteret und isch gstööbered.
Alles flaadeklar?
Uusmaalede = minderwertiges Mehl
Ammelette = Omelette
gstööbered = betrunken
