D Söi si d Schuld – an dr Luftverschmutzig. Wägen em Amoniak, wo die Suggi bim Brünzlen uuselöije. So ischs ämmel in dr Zyttig gstande.
As zum grosse Deil Söi an dr Stinkluft d Schuld syy, weiss me fryylig scho länger. Numme hei die meischtens zwee, und nit vier Schäiche.
Aber was interessiert öis scho dä ganz Brunz.
Das feelt si no, as eim no öbber verbietet, mit em Chaare bimene Billigaabieter e geedrige Schnääfel Schwyynigs go z boschte.
Dir chönnet aso berueigt syy. Wenn dr nämmlig s nächschtmool 283 Kilometer mit em Auti ins Usland faaret, wills nöimen es spottbilligs Schwyynsgottlett im Uusverchauff git, denn isch nit d Faart dört aanen Umwältverschmutzig. Nei, s Gottlett isch an dr schläächte Luft d schuld.
Yylüüchtend, nit?
brünzle = urinieren
fryylig = freilich
Schäiche = Füsse
Brunz = Unsinn
Schnääfel = dünnes Stück
