Mir lääben doch in ere gfellige Zytt. Alli hei dr Blausch.
Uf dä ville Blakat, wo ygangs Sissech in raue Mängen ummestöönde, cha mes lääse, alli heis Gaudi. Jedes Wuchenändi wird irgendnöimen ä Blauschaalass duuregfüehrt.
Sig das ä Spaghettiblausch, ä Racletteblausch, Blauschstricke, Zmoorggeblausch uf em Buurehof, Blauschtheater, Curlingblausch oder süscht öbbis Gspässigs.
Numme d Guggemuusige hei allwäg nit so dr Blausch. Uf denen ihre Blakat, wo sie ihri Kampfdrinkeraaläss aakündige, heissts nit Guggeblausch, sondern Guggewaan. Me chas verstoo. Dä muesch wohrschyynlig schon ä chly waansinnig sy, as die wildi Gügglerei ohni Schaaden an Lyyb und Gmüet üüberlääbsch. Und wär schon emol miterlääbt het, wies vor dä verschiidene Durnhalle nach sonere Zämmerottig vo üüberzwäärche Bierflääscheschwinger usgseet, verstoot, worum eigetlich niemer so richtig dr Blausch het an dr Souerei.
gfellig = glücklich
Gaudi = Spass
Guggemuusig = fasnächtliche, laut spielende Blasmusik, mit Strickkappe tragenden Mitgliedern
