Dr Noochber het jetz au eini und ich ha mir ä Sunnebrülle kchauft.
Was het das jetz mitänander z due?
Dr Noochber het sich jetz au son ä modärni Wienechtsbelüüchtig zuedo. Ä Liechtschlange mit villen überzwäärche, farbige Liechtli, wo die ganz Nacht wien ä Schyynwärfer vom ene Schuttiblatz ins Schloofzimmer zündet. Mir hei ä Soufröid, as är jetz näben em Blaschtig-Adväntschranz, em glüeinige Bakalitsantichlaus, em IKEA-Wienechtsbaum mit dän elektrische Cheerzli und em belüücheteten Adväntfänschter au no son ä Discobelüüchtig ums Huus ummeglyyret het. Wenn är abe dr Pfuus für sie Liechtorgien yyschaldet, jättets dänk im Chärnchraftwärk Gösge d Sicherigen uuse.
Mir chönnen abe zum Nachtässen in dr Stuube s Liecht ablöschen und in dr Sunnebrülle s Birchermüüesli löffle. Wenns ä so wyttergoot, müesse mir glyy afo Sunnegreemen ystryyche.
Ich wünsch einewääg allne ä bsinnlichi Adväntszyt.
überzwäärch = lästig
glüenig = glühend
lyyre = wickeln
