Für die meischte Lüüt bedüütet Zämmenaarbed, as me mitänander redet und denn zäämmen öbbis schafft.
Wie mes nit sett mache, gseht men am Byspiil vo Sissech. Dört moorggsen im Momänt die vo dr SBB an dä Bahnschiinen umme und die vom Staat grüüblen ä nöi Underfüehrig nach Zunzge.
Ich froog mi numme, wie sich die arme Sissecher in däm Chaos no z Rächt finde? Vor luuter Verchehrsverbott gseeje die jo d Chirsi nümme. Ich bi sicher, wenn die bim Metzger wei gon ä Schnääfel Schwartemaage chaufe, müsse die über Bämbel und Chärnerchinde goh cheere.
D Chinder chönne die sicher nummen no aagseilt in Chindsgi schicke, und die öltere Lüüt wärde dänk in ere Schnällbleichi vo dr Pfadi im Chaarteläsen usbildet. He nu so denn, seit dr Sissecher und gheit in die nöchschti Bougruebe.
moorggse = fehlerhaft arbeiten
Schnääfel = kleines, dünnes Stück
