Früeijer, wo d Wält no in Oornig gsi isch, het e Schnuurpfidanten es Büürzi gha und de Maitli müesse byybringe, wie me nääjt und strickt.
Hütte het e Schnuurpfidante keis Büürzi me und isch verantwortlich für e Bou vo Spitääler und Dunnäll. Öbbis vom Wichtigschte, wos sie de Lütt hütte muess byybringe, isch, worum die Sachen immer meh choschte, as men eus versproche het. Früeijer hesch albe mit dr Schnuurpfidante zämmen us Pedigrohr e Bapyyrchorb gflochten oder en Ässmantel für en Ätti gstrickt. Hütte schloot sich die modärni Schnuurpfidante mit Dunnelplään umme, oder isch sünscht nöimen am Ummenuusche.
Will Stricken und Nääje halt nit ganz s Glyych isch wien ä Dunnell boue, verstöönde mir jetz au, worum eim dr Chienbärgdunnel z Sissech e chly vorchunnt, wie zämmegschnuurpft.
Schnuurpfidante = Handarbeitslehrerin
Büürzi = Haarknoten
nuusche = suchend wühlen
