Jetz syygi fertig, hed der Grosätti letscht Wuche döipeled. Das Affetheater miech äär nümme mit.
Was isch bassiert?
Scho sit ville Joor hoolt öis der Groosvatter z Zunzgen uf em Chlöpfboodehoof früschi Hüeneräier. Äinisch in der Wuche faart äär mit syym Döffli zum Buur, nimmt döört der äint oder ander Burgermäischterli und faart denn süüferlig wiider häi, ass jo käis vo deene Hüeneräier kabutt goot.
Sit si aber z Sissech s halb Doorff uufryysse, isch der Groosvatter zimmlig underopsi. Doorum syy miir mit iim zääme ghockt und häi gluegt, wien äär am schnällschten uf Zunzge, aber no wichtiger, wien äär – ooni z übernachte – wiider häi chunnt.
Jetz gseet daas esoo uus: Er stoot am drüü am Moorggen uuf und startet as Eerschts s Satelite-Navigationsgräät, zum Luege, wo z Sissech wiider es Loch grübled wiird. Denn nimmt er es ryychhaltigs Zmoorgge mit vill Choolehydraat, isotonische Gedränk und föif Dablette gegen e hööche Bluetdruck. Der Rucksack miteme Kompass, em Sextant, allne Wander-, Chlätter- und Daucherchaarte vo der Nordweschtschwyz, emene Fallschirm, enere bruuchte K2-Chlätteruusrüschtig vom Reinhold Messner und enere NASA-Wältruum-Überlääbeskuffere. Sünscht none baar lääbeswichtigi Sache häi mer iim scho am Oobe voorhäär packt.
Syys Döffli isch mitemen Äxtrabenzintank und spezielle Gröllhaldegummipnöö uusgrüschted. Uf em Packdrääger hed iim der Göttibueb e Harpuune, es Apschleppsäil und es uusgmuschtereds Nachtsichtgräät vo der NATO mondiert. As bsundere Gluu hed er in der lingge Satteldäschen es zäämeleggbaars Äiwäägschyyssihüüsli (Achtig: Z Sissech uf em Baanhoof chönnsch nümme gattlig versüübere).
Soo uusgrüschted faart er am Vieri ummen ap und nimmt d Routen über d Islete-Eebeni, Hüenersäädel, Wintersingerhööchi, Chueftel, Üttige, Spitzebäärgg, Zunzgerhard und zrugg über d Chäärnewäid, Ärdwyybliloch und Storchenäscht. Am Ölfi zooben isch denn dä aarm Käärli früeschtens amme zrugg und gheit halber oonmächtig ins Bett.
Jetz häi mer öis überläit, d Äier im Milchhüüsli z chaufe, ass miir der Groosvatter e chlyy chönnen entlaschte. Es isch halt schone chlyy vill Uufwand – für sächs früschi Hüeneräier.
döipele – trotzen
underopsi – durcheinander
