D Frau hed mi gschickt: Bring none Krischtall mit, wenn de s nööchscht Mool ins Doorff goosch. Zeerscht bini natüürlig e chlyy verschrocke. E Krischtall. I haa doch myynere gliebte Frau eerscht grad es Brilliantcollier uf d Wienecht gschänkt. I bi aber glyych apzottled und haa mii uf d Suechi nach däm Krischtall gmacht. Und i chaan öich sääge, es isch käi äifachi Suechi woorde.
Zeerscht bini in s grööschte Gmischtwaarelaager z Sissech. Bim Yygang haani aber zeerscht noneren arme Hutten es Aarpedsloosemagazin apgchauft. Dinnen isch s denn gsii wie mäischtens: Krischtall häi miir im Momänt nit an Laager, säit d Verchöifere.
Sii hed sich zwaar Müe gee und hed miir no wellen öppis anders underejuuble. Aber wenn myy Frau säit Krischtall, denn mäint sii au Krischtall und nit Chrückerli. Iich bi also scho lyycht rumpelsurig wytter. Derbyy bini bim Reschtaurant XY fascht über s Bougrüscht gheit. Es Stück wytter vorne hätti s Krischtall ghaa, aber woni gsee haa, was die choschte, haani dänkt, i suech lieber wytter. Denn haani – wie sit Joore – en eleganti Kurven ums Plakaat vor em Beckerlaade gmacht und haa denn churz die alternative Hoochlandgäisse-Pulli im Schaufänschter vom Räucherstääbli-Imperium aagluegt. Biologisch gschürfti Krischtall hed s döört aber läider au käini ghaa.
Langsaam isch s miir gschmuech woorde. Bald Mittag – und immer no käi Krischtall. Und soo bini d Strooss wytter duraabe-gschuened. Bim Gmüeslaade hed miir äin im blauen Überchläid und miteme määrderlige Schnauz wellen en anatolischi Schoofswurscht verchaufe. Wil miir die aber immer esoo lang uufstoosse haan iich käini gkauft. Nach guet ere Halbstund haan iich mii us de Wurschthänd vom Schlachter chönne befreie.
Zügig bini d Strooss duraabe. Und doo, i haa s scho fascht nümme glaubt, haan iich dä Krischtall gfunde. Zwüsche Chees, Schnittlech und Bionuudlen isch er glääge. Jetz bini aber wäidlig häimzue gwetzt und haa ganz stolz myynere Frau der Krischtall zäigt. Sii ryysst mer en us de Finger, macht d Gschiirwäschmaschiinen uuf, hänkt das choschtbaari Juweel an Gleeserchorb und säit: Soo, jetzt chömme d Gleeser dank däm Krischtall wiider e gattlige Glanz über. Nääbenyyne: Iich bi au froo, ass d Gleeser wiider richtig glänze!
Chrückerli – Murmel
rumpelsurig – mürrisch
