Die chlääbrigi Wäärbig

De hesch di, mitere Zyttschrift as Lektüüre, gattlig uf em Liiggstuel aanebüscheled, strecksch d Flossen in d Geegend und fröisch dii uf e chlyy Fuulänze. Denn foosch afo lääse. Aber ap öppe der dritte Sytten isch s verbyy mit der Rue. Irgend sone Wäärbefritz hed s Gfüül ghaa, genau uf die Sytte müesi äär syy Wäärbebootschaft pflättere.
Iich mäin die hinterhältigi Aart vo Wäärbig, wo mit somene Pseudolyym uf d Sytte gchläbt isch. Ass de chönnsch wytterblettere, ooni ass der d Hand uusränksch, muesch das unsääglig Ding irgendwie ewägg mache. Zeerscht brobiersch mit de Finger, denn mit em Skalpell, die babyyrigi Wäärbebootschaft vom Blatt z dranschiere. De chunnsch der voor wiene Chirurg binere komplizierte Häärztransplantation.
Mäischtens verryysst bi däm häikle Voorgang aber s Bapyyr, und der Artikel uf der Rücksytte chönnsch denn numme no halb lääse. Wenn s denn gschafft hesch, die wältbeweegendi Wäärbemitdäilig ooni gröösseri Schääden uusezseziere, chunnt die nöchschti Uusefoorderig. De muesch dä chlääbrig Speziallyym mit de Dööpen apchnüüble. Das git denn so langi, gruusigi Fääde, wie bimene lauwaarme Cheesfondue. Wichtig isch bi däm Voorgang, ass de au würklig alles verwütschisch, sünscht chlääbe d Sytte döört nämmlig zääme. Wenn de nämmlig s nööchscht Mool s Heftli uufschloosch, git s e Schnatten in d Sytte, und de chönnsch…, aber über daas häi mer jo scho greeded.
Jetz ligge die uusbäinlede Bootschafte schöön byygeled voor diir.
E Füechtigkeitsgreeme für ruuchi Chinderfudi. E CD – woorschyynlig mit öppe 16 verschiidene Vyyre – über s Balzverhalte vo schyyndrächtige Buggelwaal. Sunnegreeme mit em Schutzfaktor 217, für wenn denn äinisch uf e Kilimandscharo wettisch chläädere. E 43-syttigi Broschüüren im Miniformat, wie lang me ghackte Beeterli im «Tupperware»-Gschiirli chaa uufbewaare. E Hutsalbi gege faltigi Augedeckel. E Gebruuchsaaläitig, wie men e Meersou fachgrächt uusbäinled und none Huffen anders Wäärtvolls.
Aber s wäärbetechnisch Glanzliecht haani doo letschti inere Chochzyttschrift gfunde. Yygchlemmt zwüscheneme Fläischvoogel- und emene Chruttstiilrezäpt: E Hygienebindi für Fraue. Was chäibs suecht soo öppis imene Chuchiheftli? Ebe!

chlääbrig – klebrig
Bapyyr – Papier