Grättimanne mit vill Anke. As bachtechnischi Entglöisig zwüschenyynen e Grättifrau. Fäissi Rollschinkli. Maschtigi Wienechtsgutzi in öppe 283 verschiidenen Uusfüerige. Fondü Schinuas mit öölige Söössli und um e Buuch umme Fält und Runzle.
D Wienechtszytt isch umme, und de chunnsch der voor wienen uufblooseni Fäärlimoore. De säisch dir, jetz mues öppis goo.
Imenen Aafall vo Irrsinn, haan iich mii entschlosse, es Häimwello zue z due. I haa mer fescht voorgnoo, uf däm Wello z trampe, bis d Reeder glüeinig wäärde – oder ämmel fascht.
Der hiesig Sportartikelguru hed mer das glitzrig und glänzig Monschtrum häi gliifered und inere Churzinschtruktion die wichtigschte Funktione erkläärt. Nach öppe zwee Stund bini s eerscht Mool erschöpft nääbenem Göppel zäämegsunke.
Zurzytt chummi läider noonig vill zum Faare. I bi an der ETH Züri amene Kurs in Programmierig. Bevoor me nämmlig uf däm Wello chaa afo drampe, mues men allerhand Wichtigs und Unwichtigs ins bordäigene Dateverarbäitigsgräät yygee. Imene 72-syttige Buech in 17 verschiidene Sprooche isch schöön gattlig uufgschriibe, was es alles bruucht, zum dä Göppel in Bedriib z setze. Wenn men alli Underlaage: S Familiebüechli, en Uuszug us em Stroofregischter, s Schiessbüechli, alli Schuelzüügnis binenand hed, chaa s loosgoo mit em Programmiere. Es isch scho verruckt, was men alles mues wüsse, bis men äntlig mit däm masochistischen Antiranzeprogramm chaa aafoo.
Der Durchmässer vo de Chnüüschyybe. D Lengi vo de Schuebändel. S spezifisch Gwicht vo den Oorläppli. Öb de droogenabhängig bisch (woorschyynlig wäägen em Dooping). Der Nääbe-, Sytte-, Ooben- und Undepuls und zletschtemänd der durchschnittlig Bluetdruck vo der ganze Verwandtschaft. Apropoo Bluetdruck. Dä hed s miir nach dreiviertel Stund s eerschte Mool uf öppe 216 uufe gjätted vor luuter Programmiere. Pflätschnass bini vor em Wello gstande, und i haa wiene Rennfaarer bim Uufstiig uf e Bölche ghächled und gschnuuft. Myy Halsschlagooderen isch aagschwulle wiene Chälberstrick. Myy Puls hed esoo gsyyrached, ass myy Frau verschreckt isch cho luege, öb miir e Häärde Wildsöi im Huus häige.
Jetz stramplen iich wiene Halbverruckte schwitzend vor mii aane. Ässe dueni immer no glyych vill wie voorhäär, haa aber derbyy käis schlächts Gwüsse me.
fäiss – fettig
Göppel – Karren
