Scho d Uufmachig hätt öis müese stutzig mache. Grüeni Militärsogge, e Wellohelm, wo uusgsee hed wienes yydröchneds Struussenäi, Underhoosen under de Wellohoosen und langi Hoor. Soo isch der Jüngling voor is gstanden und hed mit öis alte Chnuschti wellen e Wellouusfaart undernee. Öb sich s bim Wello um es Modäll us em Häimedmuseum Sissech ghandled hed, syy mer no am Apklääre. Aber an den apgloffene Gummipnöö aa, mues das Wello no us der Zytt vo de Pfaalbauer stamme.
Denn isch s zimmlig zümftig loosgange. Wiene Sou in e Rüebacher hed der Jüngling loosgläit. Über die eerschte Hübel isch äär wiene junge Hirsch gstrampled und hed uf em Gipfel jeedes Mool miteme hoochmüetige Lächlen uf öis gwaarted. Miir häin is nummen öisi Sach dänkt. Miir häi nämmlig gwüsst, irgend äinisch wiird d Luft für dää jung Spund dünn. Das isch wie bi de Chälber, wenn sii s eerscht Mool uf d Wäid döörffe.
Am Aafang sieche sii wie die Gstörten ummenander, aber nacheme Zyttli goot ene denn schnäll der Schnuuf uus. Aber äigedlig sett jo e junge Burscht intelligänter syy as es Chalb. Häi mer ämmel gmäint.
Er hed groossi Sprüch gchlopft, hed sich über öis luschtig gmacht, wääge Ränzen und e soo und isch e schampaar e Glatte gsii. Nacheme Halt, wo miir e chlyyni Zwüscherverpfläägig zuen is gnoo häi – der Jüngling hed öppe vier Syygerette graucht – isch d Faart wytter gange. Jetz isch d Chlöönerei aber loosgange. Öise Jüngling hed fürchterlig afo joomere. S Füdle döig im wee. Äär häigi müedi Bäi und es syg im halber schlächt. Er isch öis voorchoo wiene Wäschlumpen uf zwöi Reeder.
Es hed scho langsaam afo dunkle, und öis hed s langsaam afo tschuudere, do isch der Jüngling – und daas under wüeschte Beschimpfige – doch no z Sissech aachoo. Miir häi iin grad no chönne heebe, ass äär nit vom Göppel gheit isch. An äim vo syyne underentwicklede Wäädli hed s e gruusige Schliirgg Chaareschmiiri ghaa. Isch äär emänd im Dilirium nöimen uf e Sack gheit? Miir wüsse s nit!
Woner wiider äinigermaasse normaal hed chönne schnuufe, hed der Jüngling öis gschwoore, er döigi sich jetz afo apherten und jeede Daag e soumeessig aaspruchsvolli Uusfaart undernee. Miir luege der Sach zimmlig glassen entgeege. Miir würde s scho doll finde, wenn er s nööchscht Mool käini Militärsoggen aahätti!
Sou im Rüebacher – ab wie die Polizei
schampaar – sehr
