D Brootwurscht

Es isch halt doch nit Wurscht, was in d Wurscht chunnt, und doorum häi miir jetz der Sämpf mit der Wurscht.
Um öis umme wäärde d Rinder verruckt oder wäärde wäge der Muul- und Chlauesüüchi duubedänzig. D Söili und d Chälber wäärde mit Hormoon zu wässrige Luftbalöön uufbloose, und d Hüener picken enander geegesyttig d Fäädere vom Lyyb. Bi deene Uussichte blybt äim doch grad d Chalbsbrootwurscht im Hals stecke.
Es isch halt scho luschtig: Für alls häi mer Gäld, numme bim Ässe, doo wiird gschmürzeled. Ganzi Völkerstämm pilgere Samschtig für Samschtig über d Gränze, numme wil s im Ussland d Würscht und d Schwyynshaxe, d Gällerüebe und d Chruttstiil e baar Batze billiger git. Es kümmered die wenigschte, was die Metzger in d Würscht yyne wurschtle, wichtig isch, es isch billig. Derbyy wüssti men äigedlig, wenn me nöime Grümpel obenyyne loot, chunnt unde halt au numme Grümpel uuse.
Stolz brichte denn die kulinarische Dieffflieger, sii häige wiider es speziells Super-Billig-Aagebott gfunden und grad es Dotzed vo deenen uusgmergglede Chalberwürscht zrugg in d Schwyz gschläipft. Ass sii grad so guet chönnten e Wöschlumpen uf e Grill gheien und ass die Brootwurscht mee nach Gurrit as nach Fläisch schmöckt, spiilt käi Rolle, Hauptsach, s isch billig.
Jetz foot denn glyy wiider d Grillsaison aa, wo sich Familievätteren in Grillzangemonschter verwandle. Uf sündhaft düüre Spezial-Titan-Grill, mit Holzchoolen us finnische Niiderstammbirke, wäärde richtigi bengalischi Zauberfüür entfacht. Die veräinigte Holzchoolezünzerli schliesse sich zeerscht zue überregionale Grillklüb zäämen und duusche zletschtamänd iiri Erfaarigen in internationale Holzchoolesymposien uus.
Mäischtens aber stoot läider daas, wo uf e Grill chunnt, imenen unglaublige Missverheltnis zue der nöimöödische Uusrüschtig vo deene Freiluft-Maîtres. Glyy isch s also wiider so wyt, und es läit sich Wuchenänd für Wuchenänd e schwaarzi Grillrauchschwaaden über d Gäärten und Matte, und es wäärde Hunderti vo billige Würscht – spindeldür und furzdroche – as boodeständigi Choscht uuftischt. Und gässe.
Zum Schluss no äis: Natüürlig git s no gueti Würscht! Numme müest me halt au der Wille zäigen und e chlyy mee uusgee derfür. Aber solang s Trottinett – Entschuldigung: s Kickboard – de mäischte mee Wäärt isch as e gueti Brootwurscht, wiird allwääg immer wiider allergattig Gschmöis verwurschted.
Häit e Guete!

duubedänzig – wahnsinnig, verrückt
schmürzele – sparen